Þetta var fyrsta skrefið í uppbyggingu Running Tide á fullbúnustu rannsóknar-, þróunar- og framleiðsluaðstöðu vegna stórþörungaræktar á Íslandi. Þar ræktuðum við fyrsta beltisþarann og fyrstu maríusvuntuna, sem sótt hafði verið úr nærliggjandi strandsvæðum af köfurum og þörungafræðingum.

Lava Seaweed er samstarfsverkefni Ocean Rainforest og íslenskra frumkvöðla sem snýst um að rækta upp nokkrar tegundir þörunga til vinnslu og notkunar við nautgriparækt, en áætlað er að með því að gefa nautgripunum það fóður lækki kolefnisspor vegna dýranna umtalsvert.

Þau vinna nú að aðlögun á gámnum að sínum ferli, en þar fara fljótlega af stað tilraunir með sölvarækt.

Eitt af því sem við áttum var rósetta, sem sumt vísindafólk kallar mikilvægsta tólið í haffræði. Hún mun fá nýtt heimili hjá Hafrannsóknarstofnun Íslands, og þykir okkur mjög vænt um það.

Við áætluðum að afhenda tækið eftir sumarfrí, en gerðum það nú í gær, til að “redda” Röst sjávarannsóknarsetri, sem stundar rannsóknir á sviði kolefnisbindingar í hafi (eins og við!).

Vísindafólk á þeirra vegum er statt hér í nokkrar vikur að gera rannsókn tengda kolefnisbindingu í hafi í Hvalfirði, en rósettan sem þau ætluðu að nota skemmdist.

Þá eru góð ráð dýr, enda lítið um rósettur á Íslandi — líklega því hér eru (allt of) fáir aðilar sem stunda hafrannsóknir á einhverjum skala. Eftir samtal við Röst og Hafró, stakk fólkið okkar til úr fríi og græjaði afhendingu hið snarasta til að hægt væri að framkvæma rannsóknina.

Við óskum Hafró til hamingju með nýja gripinn, og Röst velfarnaðar í sínum rannsóknum og vonum að hún nýtist vel!

Í júnímánuði 2024 var umfjöllun og umræða um kolefnisbindingu í hafi og Running Tide. Á sama tíma og Running Tide fagnar umræðu um jafn mikilvægt mál, hafa rangfærslur og staðreyndavillur því miður verið áberandi.

Megnið af þeim rangfærslum sem settar hafa verið fram hefði verið auðvelt að sannreyna enda hafa legið fyrir ítarleg og greinargóð gögn og umfjöllun á vefsvæði okkar (t.d. Aðferðir Running Tide, Afhverju Ísland, og Algengar spurningar og svo gagnabankinn okkar Docs.RunningTide.Com). Að auki voru allar þessar upplýsingar og meira til sent til þess blaðafólks sem fjallað hefur um félagið að undanförnu.

1. Því hefur verið haldið fram að þörungurinn hafi horfið og að það sé athugavert að Running Tide hafi ekki lokið öllum áföngum fjögurra ára rannsóknaráætlunar strax á fyrsta ári. Það er rangt. Rannsóknaráætlun sem tiltekur ítarlega fyrirætlanir Running Tide hefur legið fyrir hjá stjórnvöldum síðan á haustmánuðum 2022. Hún var rýnd af óháðu vísindaráði Running Tide og hefur legið fyrir opinberlega síðan snemma árs 2023. Þar kemur skýrt fram að fyrsti fasi rannsóknarinnar snúist um að fleyta efni (húðuðu trjákurli) sem nýtanlegt er sem undirlag undir þörungavöxt, en bindur kolefni upp á sitt eindæmi sömuleiðis sé því sökkt djúpt á hafsbotn. Til að tryggja bindingu er mikilvægt að skilja hvar trjákurlið endar og fyrsti fasi snerist um að þróa aðferðir við að mæla, greina, spá fyrir um og sannreyna einmitt það. Samtímis átti sér stað marglaga og árangursríkt þróunarstarf í þörungarækt sem var undirbúningur fyrir seinni stig rannsóknaráætlunarinnar þegar til stóð að fleyta grósettu trjákurli. Frá 2022, þegar Running Tide hóf starfsemi á Íslandi, hefur félagið byggt upp hátækniaðstöðu, þróað aðferðir við ræktun á landi, náð góðum árangri í að vinna með íslenska maríusvuntu (ulva lactuca/fenestrata) og beltisþara (saccharina latissima), gert fjölda tilrauna með aðferðir til grósetningar, og ræktað þörung reglulega á rúmsjó, sem margir hafa hingað til sagt illmögulegt. Lesa má skýrslur um árangur okkar í þörungastarfinu hér.

2. Því hefur verið haldið fram að það að sökkva trjákurli í hafið feli ekki í sér kolefnisbindingu. Það er rangt. Tré grípa koldíoxíð úr andrúmslofti við vöxt, og í stað þess að kolefnið losni aftur út í andrúmsloftið við öndun, rotnun eða brennslu, binst kolefnið í formi lífmassa á hafsbotni sé því sökkt á mikið dýpi. Þannig færist kolefni úr andrúmslofti á hafsbotn. Heimildin birti skýringarmynd af aðferðum til kolefnisbindingar í hafi sem inniheldur m.a. að sökkva lífmassa af landi líkt og Running Tide gerði en heldur því fram á sama tíma að það sé ekki aðferð við bindingu, sem er þversögn og stenst ekki skoðun.

   Frekari upplýsingar um varanlega kolefnisbindingu með því að sökkva lífmassa af landi eins og trjákurli má finna í eftirfarandi alþjóðlega viðurkenndum skýrslum og greiningum:

   1. GESAMP: High Level Review of a Wide Range of Proposed Marine Geoengineering Techniques

   2. Carbon Plan Terrestrial Biomass Sinking

   3. The State of Carbon Dioxide Removal 2024

2. Látið er að því liggja að starfsemi Running Tide á Íslandi hafi verið einhverskonar leynimakk. Það stenst enga skoðun. Fjölmargir fjölmiðlar, innlendir og erlendir hafa fjallað um verkefni Running Tide og fyrsta fasa rannsóknarverkefnisins sem snerist um að sökkva kalksteinshúðuðu timburkurli, eins og Fiskifréttir eða Skessuhorn og New Scientist og þessar upplýsingar hafa verið aðgengilegar á vefsvæði félagsins lengi. Þá komu hópar reglulega í heimsókn, og stóðum við fyrir opnum húsum. Ítarlegar upplýsingar um rannsóknaráætlun, yfirfarin af óháðu vísindaráði Running Tide, lágu fyrir hjá Umhverfisstofnun og Hafró frá haustmánuðum 2022 og þá sendi Running Tide skýrslur á þær stofnanir í samræmi við samráðsáætlun á þriggja mánaða fresti.

3. Því hefur verið haldið fram að enginn utanaðkomandi aðili hafi rýnt aðferðir og gögn Running Tide. Það er rangt. Aðferðafræðin var rýnd af yfir 50 óháðum aðilum. Deloitte yfirfór lykilþætti í aðferðafræði Running Tide í samræmi við ISO 14064-2 staðalinn, en hann tiltekur hvernig eigi að reikna út kolefnisbindingu verkefna. Óháð vísinda- og tækniráð fyrirtækja sem styrktu starfið á borð við Microsoft og Stripe/Frontier tóku út þau gögn sem liggja til grundvallar bindingunni, áður en þau veittu einingum Running Tide viðtöku. Running Tide afhenti svokallaðar self-verified einingar sem þýðir að kaupandinn tekur virkan þátt í rýninni, eins og almennt á við um verkefni á rannsóknar- og þróunarstigi.

4. Því hefur verið haldið fram að starfsemi Running Tide sé ábatasamt svindl eða svikamylla. Það er rangt.  Í gegnum rannsóknar- og þróunarstarf sitt batt Running Tide um 25 þúsund tonn af koltvísýringsígildum með því að sökkva lífmassa af landrænum uppruna (þ.e. trjákurli) í djúpsjó. Að sökkva lífmassa af landrænum uppruna er viðurkennd aðferð til kolefnisbindingar samkvæmt alþjóðlega viðurkenndum aðilum sem listaðir eru hér fyrir ofan. Running Tide útbjó ítarlegar skýrslur um bindingu og þá losun sem bindingunni tengist og deildi með sínum styrktaraðilum eins og Microsoft, Shopify og Stripe. Þar sem um aðferðafræði í þróun er að ræða er ekki til staðlað vottunarferli. Þess í stað rýndi sjálfstætt vísinda- og tæknifólk gögnin (sjá t.d. Gæðakröfur Microsoft og sérfræðingahóp Stripe/Frontier) og staðfesti bindingu aðferðafræðinnar. Sú yfirferð er framkvæmd áður en einingum er veitt viðtaka og styrkurinn greiddur út. Einingarnar veita engum losunarheimildir og eru ekki tengdar neinu formlegu kerfi losunar, enda valkvæðar og nýttar til að styrkja rannsóknar- og þróunarstarf. Kostnaður Running Tide við hverja einingu var um þrefalt hærri en styrkurinn sem félagið fékk frá þessum aðilum, enda miklu til kostað við uppbyggingu á aðstöðu, laun til sérfræðinga, leigu á skipum, kaup á efni og fleira. Í umræðunni er ekki minnst á það góða þróunarstarf á sviði haffræði, þörungaræktunar og fleira sem fyrirtækið stóð að eins og lesa má um á vefsvæði Running Tide á docs.runningtide.com.

5. Ýjað er að því að aðferðir Running Tide virki ekki. Það stenst enga skoðun. Aðferðin snýst um að binda kolefni með því að 1) sökkva lífmassa eins og trjákurli; 2) leysa upp basavirk efni til að hafa áhrif á sýrustig sjávar, og 3) rækta stórþörunga á rúmsjó sem síðan er sökkt. Running Tide náði mikilvægum árangri á öllum þessum sviðum. 

   1. Running Tide sökkti lífmassa, reiknaði út hvar hann sökk, og hélt utan um kolefnisspor til að tryggja að bindingin væri raunveruleg.

   2. Running Tide mældi og reiknaði áhrif á basavirkni.

   3. Running Tide byggði upp þörungarannasóknir og ræktaði þörung á rúmsjó sem margt vísindafólk hefur talið illmögulegt.

   Það sem ekki gekk var að tryggja áframhaldandi nægilega fjármögnun á viðamiklu og kostnaðarsömu rannsóknar- og þróunarstarf í erfiðu fjármögnunarumhverfi.

7. Umfjöllunin hefur gefið til kynna að eitthvað slæmt hafi átt sér stað eða að um neikvæð umhverfisáhrif sé að ræða. Það er rangt. Engin vísindaleg gögn liggja fyrir því til stuðnings að nokkuð neikvætt hafi átt sér stað við framkvæmd tilraunafleytinga Running Tide. Þvert á móti svaraði norska hafrannsóknarstofninun, NIVA, fyrirspurn Heimildarinnar á þann hátt að Running Tide hafi framkvæmt mjög ítarlega greiningu á mögulegum umhverfisáhrifum að mati NIVA. NIVA gerði auk þess sjálfstæða greiningu með spálíkönum á áhrifum þess að sökkva timbri á hafsbotn sem gaf til kynna að magnið sem Running Tide fleytti hafi verið um 120x undir hættumörkum. Blaðafólk Heimildarinnar kaus að birta ekki svör frá Norsku hafrannsóknarstofnunni. Running Tide deildi einnig greiningu á umhverfisáhrifum með opinberum aðilum og öðrum hagaðilum áður en rannsóknarstarfið hófst.

8. Því hefur verið haldið fram að Running Tide hafi reynt að komast undan eftirliti. Það er rangt. Í samræmi við rannsóknarleyfið setti Running Tide upp samráðsferil með Hafrannsóknarstofnun og fékk Umhverfisstofnun öll sömu gögn, og var gögnum um framgang, fyrirætlanir og niðurstöður starfsins deilt með þessum aðilum á þriggja mánaða fresti. Þá hafði Umhverfisstofnun ítarlegar upplýsingar um rannsóknaráætlun, aðferðafræði, greiningar á mögulegum umhverfisáhrifum og fleira. Að öðru leyti var ekki eftirlit á höndum Umhverfisstofnunar, en stofnunin sagði sig frá verkefninu. Running Tide þykir það miður og hefði heldur kosið að Umhverfisstofnun sinnti eftirliti og gæti því staðfest að engin umhverfisóhöpp áttu sér stað og að markmiðum fyrsta fasa rannsóknarstarfsins var náð.

9. Því er haldið fram að orðspor Íslands sé í hættu. Það er fjarri raunveruleikanum. Einn helsti vísindamaður heims á sviði hafvísinda, Andreas Oschlies, þakkaði íslenskum stjórnvöldum sérstaklega fyrir framsýni sína við að styðja við rannsóknar- og þróunarstarf. Sjávarrannsóknarsetrið Röst hóf nýlega starfsemi á Íslandi og er hluti af einu virtasta rannsóknarverkefni heims á sviði kolefnisbindingar í hafi (Carbon to Sea) og veitti Röst Hafrannsóknarstofnun styrk upp á 60 milljónir fyrr á árinu, allt í kjölfar þess að Running Tide hóf starfsemi á Íslandi, meðal annars vegna áhuga stjórnvalda á Íslandi á því að styðja við þróun á lausnum tengdum kolefnisbindingu, eins og kemur skýrt fram í stjórnarsáttmála ríkisstjórnarinnar. Ocean Visions, samstarfsnet sumra virtustu rannsóknastofnana heims á sviði hafrannsókna og þróunar hefur óskað Íslandi til hamingju með að vera leiðandi á þessu sviði.

10. Því var haldið fram að aðkoma Deloitte hafi ekki tengst kolefnisbindingu á neinn hátt. Það er rangt. Deloitte yfirfór lykilþætti í fyrirhugaðri aðferðafræði Running Tide í samræmi við ISO 14064-2 staðalinn, en hann tiltekur hvernig eigi að reikna út kolefnisbindingu verkefna. Þessum upplýsingum kom Deloitte til Heimildarinnar en Heimildin ákvað að birta þær ekki.

Auk þessara rangfærslna, hafa einnig komið fram staðreyndavillur og aðdróttanir sem þarf að leiðrétta.

• Það vísindafólk sem Heimildin ræddi við hefur ekki rýnt aðferðafræði eða gögn Running Tide og er því erfitt að sjá hvernig þau geta verið áreiðanlegir álitsgjafar um störf félagsins. 

• Í umfjöllun Heimildarinnar var því haldið fram að leyfið sem Running Tide fékk hafi verið 50 þúsund tonn á ári. Það er rangt. Leyfið náði til 50 þúsund tonna yfir fjögurra ára tímabil, og innihélt skilyrði um rannsóknarefni og samráð. Rétt er að taka fram að Running Tide nýtti einungis hluta leyfisins, og fleytti samtals 19 þúsund tonnum í 15 aðskildum rannsóknarleiðöngrum.

• Blaðamaður Heimildarinnar hefur haldið því fram í útvarpi að Running Tide hafi komið til Íslands til að losna undan eftirliti. Það stenst enga skoðun. Löngu áður en Umhverfisstofnun ákvað einhliða að segja sig frá verkefninu, var Running Tide búið að fjárfesta í aðstöðu, búnaði, starfsfólki og fleiru fyrir mörg hundruð milljónir. Ákvörðun Umhverfisstofnunar frá maí 2023 hafði því engin áhrif á ákvörðun Running Tide um að byggja upp og gera rannsóknar- og þróunarstarfið út frá Íslandi.

• Blaðamaður Heimildarinnar hefur haldið því fram í útvarpi að við höfum notað mengað efni. Það er rangt og stenst enga skoðun. Kalksteinninn er íslenskur, mulinn skeljasandur eða hliðarafurð úr steinefnaframleiðslu sem er notuð t.d. í landbúnaði. Allt trjákurl sem nýtt var í starfseminni er frá vottuðum framleiðendum. Vottorðum þar að lútandi var deilt með blaðamanni en upplýsingar þar um hafa ekki ratað í umfjöllun blaðsins.

Meira og minna öllum þessum upplýsingum um áætlanir, framkvæmd, vísindalegan grunn og starfsemi félagsins á Íslandi var komið til skila til þess blaðafólks sem vann umfjöllunina.

Í þau örfáu skipti sem mælibaujur Running Tide reka á land við Íslandsstrendur eru þær sóttar um leið og færi gefst til. Nú hefur teymið okkar sótt baujur á Reykjanes, Snæfellsnes og Skaftárhrepp en Running Tide leggur mikla áherslu á að sækja öll mælitæki sem reka á staði sem þau eiga ekki að vera á. Að auki lærum við heilmikið af þessum tækjum um áhrif sjávar á skynjara og mælitæki sem nýtist í áframhaldandi þróun baujanna.

Í fyrri björgunarferðum hafa baujunar verið sóttar fótgangandi en ferðin sem farin var í janúar síðastliðnum var frábrugðin að því leyti að mælibaujan var sótt þegar hún maraði enn í sjó í Faxaflóa. Það þurfti að hafa hraðar hendur þar sem baujan var löskuð og teymið okkar hafði áhyggjur af því að hún myndi ekki ná landi áður en hún hætti að senda GPS merki um staðsetningu sína. Running Tide fékk því björgunarsveitina Lífsbjörg í Snæfellsbæ í lið með okkur við að endurheimta baujuna. 

Sex manna áhöfn ásamt starfsmanni frá Running Tide lögðu af stað snemma morguns  á björgunarbátnum Björg og sóttist ferðin vel þrátt fyrir hið íslenska veðurfar. Notast var við GPS hnit frá baujunni og fannst hún innan við fimm mínútna leit á svæðinu þar sem hún sendi inn síðustu hnit. Í heild tók sjóferðin um 8 klukkustundir og þakkar Running Tide áhöfn og skipinu Björg fyrir ómetanlega þjónustu og fagmennsku. 

Gleðilega nýsköpunarviku!

Running Tide á Íslandi hefur alltaf verið ötull talsmaður nýsköpunarviku, og iðulega tekið þátt með einhverjum hætti. Í fyrra var Marty Odlin, stofnandi og forstjóri, á panel á stóra sviðinu, og við buðum ráðstefnugestum í heimsókn til okkar á Breið.

Þetta skiptið tökum við þátt í tveim viðburðum:

• Í dag, fimmtudag, kl 14:00, tökum við þátt á panelnum Carbon Cleanup: Undoing Historical Emissions. Panellinn er á skrifstofu Transition Labs, Lækjargötu 2a, og fjallar um hlutverk kolefnisbindingar sem einskonar úrgangsvinnslu, en þema OK Bye í ár er Úrgangur.

• Á morgun, föstudag, milli 15:00-18:00 tökum við þátt á opnu húsi á Breið vegna nýsköpunarviku, en Alda, þörungaræktin okkar og rannsóknarstofa, er staðsett þar. Hlekkur á viðburðinn.

Við skrifuðum grein í Vísi - Betur má ef duga skal - en hún fjallar um kolefnisbindingu og nauðsyn hennar:

Kolefnisbinding er nefnilega þjónusta sem í rauninni enginn vill að sé þörf fyrir. Hvorki við sem vinnum að því að búa hana til, né þau sem þurfa að kaupa hana, því hún er merki um mistök fortíðar og vanmátt okkar og tregðu til að bregðast við vandamálinu sem við stöndum frammi fyrir. En staðan í dag er sú að annað er ekki hægt, við verðum að gera allt sem við getum. Betur má, ef duga skal.

• Lesa hér.

Norska hafrannsóknarstofnunin, Niva, birti nýlega veggspjald á ársþingi evrópskra jarðvísinda upp úr verkefni sem þau unnu fyrir okkur um greiningu á mögulegum umhverfisáhrifum af því að sökkva timbri (og kolefninu sem í því býr) á hafsbotn.

Niðurstöðurnar sýna að aðferðir okkar til kolefnisbindingar rúmast vel innan marka um viðunandi vatnsgæði samkvæmt Norskum stöðlum, og líklegt má telja að áhrif okkar á hafsbotninn útfrá áhrifum þess að vatnsgæði hafi verið lítil sem engin, líkt og við gerðum ráð fyrir.

• Lesið meira hér: Niðurstöður greiningar á umhverfisáhrifum kynntar á ársþingi evrópskra jarðvísinda (EGU)

Við deildum upptöku af panel, sem var hýstur í tengslum við Loftslagsdaginn 2023, um kolefnisbindingu í hafi.

• Horfið á hann hér.

Eftirfarandi grein birtist á Vísi í tilefni af Nýsköpunarviku.

Í næstu viku verður Nýsköpunarvikan haldin hátíðleg en hún er árlegur viðburður þar sem nýsköpun er gert hátt undir höfði. Nú eru liðin tvö ár síðan við hjá Running Tide tilkynntum á Ok bye, einum af viðburðum Nýsköpunarvikunnar, að við ætluðum að hefja starfsemi á Íslandi til að rannsaka og þróa aðferðir til varanlegrar kolefnisbindingar - iðnað sem enginn óskaði sér að við þyrftum, en við þurfum, og það hratt.

Varanleg kolefnisbinding - ein stóru áskorana 21. aldarinnar

Á síðustu árhundruðum höfum við mannfólkið dælt upp kolefni úr hægu kolefnishringrásinni (t.d. jarðefnaeldsneyti - kolefni í geymslu), brennt það, og komið því fyrir í hröðu kolefnishringrásinni (andrúmslofti og efstu lögum sjávar). Við komum náttúrulegu flæði á milli kerfa í ójafnvægi, sem leiddi til breytinga á veður- og vistkerfum sem eru nú þegar farnar að valda okkur ómældu tjóni. Eina leiðin til að bregðast við er að draga snarlega úr losun (minnka skaðann) og skila til baka því sem hægt er (laga til eftir okkur). Þar kemur varanleg kolefnisbinding til sögunnar, en það er samheiti yfir aðferðir sem taka kolefni úr hröðu kolefnishringrásinni - þ.e. andrúmslofti eða efstu lögum sjávar - og binda það varanlega í þeirri hægu - í jarðlögum, sem steinefni eða djúpt á hafsbotni. 

Fyrir nokkrum áratugum hefði verið eðlilegt að spyrja „hvort“ við ættum að setja tíma og peninga í að binda kolefni. En vegna þess að okkur hefur ekki tekist að draga nægilega úr losun gróðurhúsalofttegunda þá er það ekki lengur spurning um hvort, heldur bara um hvar, hvenær, og hvernig. Markmiðið er skýrt: samkvæmt Milliríkjanefnd Sameinuðu þjóðanna um loftslagsmál (IPCC) þurfum við - heimurinn í sameiningu - að byggja upp þekkingu og getu til að binda varanlega á bilinu 6-10 milljarða tonna af CO2 á ári um miðja öld.

Því miður er sama uppi á teningnum í varanlegri kolefnisbindingu og annars staðar í loftslagsmálunum. Í nýrri rannsókn sem birt var í Nature í síðastliðinni viku, kemur fram að ríki heims eigi enn langt í land með að áætlanir þeirra um uppbyggingu á kolefnisbindingu gangi eftir. Betur má ef duga skal.

Margar aðferðir en engin töfralausn

Margar aðferðir til kolefnisbindingar eru á teikniborðinu, og sumar þeirra, t.d. þær aðferðir sem Running Tide þróar, eru jafnvel áratuga gamlar hugmyndir vísindafólks sem rannsakaði kolefnisbindingu áður en hún varð vinsælt umfjöllunarefni. Aðferðirnar miða flestar að því að herma eða magna upp náttúrulega ferla kolefnisbindingar, til dæmis með því að vinna með kolefni sem plöntur og tré hafa bundið með ljóstillífun og geyma það varanlega í jarðlögum (eins og Charm Industrial) eða djúpt neðansjávar (eins og Running Tide eða Rewind). Önnur taka koltvísýring beint úr andrúmsloftinu (eins og Climeworks eða Heirloom Carbon) og hraða umbreytingu hans í steindir með aðstoð vatns og niðurdælingar í berg (eins og Carbfix eða 4401).

Running Tide vinnur að því að magna aðferðir sjávar, sem í dag bindur gífurlegt magn af kolefni með náttúrulegum leiðum. Til þess vinnum við kolefnisflothylki - húðum timburkurl með kalksteini sem verður undirlag undir þörungavöxt á rúmsjó. Með tímanum minnkar flotgetan og að lokum sekkur allt saman á hafsbotn. Vísindafólk okkar nýtir spálíkön og sérhönnuð mælitæki til að tryggja að efnið sökkvi að lágmarki niður fyrir þúsund metra, en þannig er fyrirséð að kolefnið sem er fast í timbrinu og þörungunum binst í hundruð eða þúsundir ára í djúpsjó.

Mikill árangur af starfinu nú þegar

Á síðustu tveimur árum höfum við:

• byggt upp frábæra aðstöðu til þörungaræktar og rannsókna í Breið á Akranesi 

• þróað fyrstu útgáfu kolefnisflothylkjanna og prófað eiginleika þeirra í bak og fyrir.

• þróað mælitæki sem ná 99% uppitíma á rúmsjó, eru sérhönnuð til að mæla og greina kolefnisbindingu og kosta 5-15 sinnum minna en það sem er fyrir á markaðnum (kostnaður við mælitæki er ein stór hindrun við kolefnisbindingu á hafi)

• þróað hugbúnað til að reikna út bindigetu

• aðlagað og þróað haffræðileg spálíkön til notkunar við kolefnisbindingu

• klárað fyrsta fasa rannsóknarverkefnisins með því að fleyta um 19.000 tonnum af kalksteinshúðuðu kurli á rúmsjó í 15 tilraunafleytingum, fylgst með því fljóta og sökkva, mælt og greint og þannig bundið varanlega rúmlega 25.000 tonn af CO2-ígildum - jafnmikið og 12.000 fólksbílar losa á einu ári

• ræktað stórþörunga á rúmsjó og náð því á mynd - fyrst allra í heiminum

• rannsakað mögulegar hliðarverkanir á hafsbotn á 30, 1.200, og 3.400 metra dýpi í samstarfi við leiðandi stofnanir á heimsvísu

• tekið á móti vísindafólki, fjárfestum, og kjörnum fulltrúum erlendra ríkja í heimsókn á Akranes

Með þessu höfum við beint sjónum heimsins að þeim tækifærum sem fylgja því að byggja upp nýsköpunar og þróunarstarf tengt hafsækinni, sjálfbærri starfsemi á Íslandi.

Að fjármagna það sem enginn vill

En allt þetta kostar sitt og við eigum tilvist okkar að þakka alþjóðlegum fjárfestum og styrktaraðilum loftslagslausna, en ekki síður þeim viðskiptavinum sem hafa styrkt hluta rannsókna okkar með kaupum á valkvæðum kolefniseiningum. Þessar valkvæðu einingar nýtast ekki við að leyfa viðbótarlosun og eru ekki hluti af neinu alþjóðlegu kerfi eins og ETS og sala þeirra ein og sér dugar ekki til að fjármagna raunverulegan kostnað við rannsóknirnar eða kolefnisbindinguna sem af þeim stafar. 

Samt sem áður eru þessir viðskiptavinir einn mikilvægasti hlekkurinn í núverandi umhverfi kolefnisbindingar. Þetta eru alþjóðleg tæknifyrirtæki eins og Microsoft með metnaðarfulla sjálfbærnistefnu sem hafa tekið brot af sjálfbærnifjármagninu og beint því í kaup á valkvæðum einingum til að styrkja rannsóknir og þróun á kolefnisbindingaraðferðum. Áður en þau kaupa einingar vinna þau náið með vísinda- og tæknifólki við greiningar á möguleikum, áhrifum, og virkni aðferðanna, auk þess að rýna teymið sem stendur að baki lausnunum og fyrirætlunum þeirra. Við eigum þessum viðskiptavinum mikið að þakka.

Kolefnisbinding er nefnilega þjónusta sem í rauninni enginn vill að sé þörf fyrir. Hvorki við sem vinnum að því að búa hana til, né þau sem þurfa að kaupa hana, því hún er merki um mistök fortíðar og vanmátt okkar og tregðu til að bregðast við vandamálinu sem við stöndum frammi fyrir. En staðan í dag er sú að annað er ekki hægt, við verðum að gera allt sem við getum. Betur má, ef duga skal.

Running Tide mun taka þátt í opnu húsi á Breið af nýsköpunarvikunni - frekari upplýsingar hér. Einnig geta áhugasamir fundið upplýsingar um starfsemi okkar á Íslandi á vefsíðunni iceland.runningtide.com.

Niðurstöðurnar sýna að aðferðir okkar til kolefnisbindingar rúmast vel innan marka um viðunandi vatnsgæði samkvæmt Norskum stöðlum, og líklegt má telja að áhrif okkar á hafsbotninn útfrá áhrifum þess að vatnsgæði hafi verið lítil sem engin, líkt og við gerðum ráð fyrir.

Stofnunin skrifaði matsgerð sem byggir á líkönum og fræðigreinum sem síðan var kynnt á alsherjarþingi Evrópska jarðvísindafélagsins (EGU general assembly) í apríl 2024.

Í stuttu máli var markmið verkefnisins að áætla hversu mikið mætti safnast upp af kolefni (í formi viðarkurls) á sjávarbotninum án þess að það hefði neikvæð áhrif á vatnsgæði. Niðurstöður NIVA sýna að þéttleiki efnis upp á 3600 gC/m² og 5 mm dýpt sé innan viðunandi vatnsgæða. Til samanburðar var þéttleiki efnis á hafsbotninum í tilraunafleytingum á Íslandi árið 2023 að hámarki 30 gC/m² og ~0,06 mm dýpt, eða meira en 100x undir mörkum. Þessi niðurstaða er í samræmi við okkar áætlanir eins og hefur komið fram áður.

Fyrir áhugasama má finna afrit af skýrslunni á skjalasvæðinu okkar, https://docs.runningtide.com:

• Beinn hlekkur á skýrsluna og veggspjaldið.

Síðastliðinn miðvikudag kynnti forsvarsfólk XPRIZE - Carbon Removal yfirlit yfir þau 100 teymi á heimsvísu sem eru enn hluti af valinu til að vinna verðlaunin.

XPRIZE - Carbon Removal eru verðlaun til framúrskarandi lausna á sviði varanlegrar kolefnisbindingar, studdar af Elon Musk og Musk Foundation. Í verðlaun eru $100M sem dreifast milli efstu keppenda.

Til að sigra, þurfa keppendur að sýna virka lausn sem bindur að lágmarki 1,000 tonn af CO2-ígildum á ári, hafa áætlanir um kostnað og möguleika við 1 milljón tonna á ári, og sýna raunhæfan möguleika á að ná milljörðum tonna (gigatonnes) á ári í framtíðinni.

Hundruðir fyrirtækja og teyma skráðu sig til leiks, og er gaman að sjá að Running Tide og Carbfix, sem hvorutveggja eru með starfsemi á Íslandi, séu á listanum. Þannig er 2% listans á Íslandi sem hlýtur að vera einhverskonar heimsmet (miðað við höfðatölu!)

Nýlega birti Transition Labs áhugaverðar pallborðsumræður um kolefnisbindingu í hafi sem áttu sér stað í maí á síðasta ári, með leiðandi vísindamönnum og sérfræðingum í loftslagsmálum. Pallborðinu var stjórnað af Justin Ries, prófessor í sjávar- og umhverfisvísindum, við Northeastern University. Þátttakendur pallborðsumræðanna voru:

• Jim Barry, yfirvísindamaður og sjávarvistfræðingur við Monterey Bay Aquarium Research Institute og stjórnarmaður Ocean Visions.

• Andreas Oschlies, forstöðumaður rannsóknarsviðs Biogeochemical Modeling, hjá GEOMAR í Þýskalandi

• Snjólaug Árnadóttir, dósent við lagadeild Háskóla Reykjavíkur (HR) og forstöðumaður sjálfbærni- og loftslagsréttarstofnunar HR.

• Hrönn Egilsdóttir, sviðsstjóri umhverfissviðs hjá Hafrannsóknastofnun.

• Aðalbjörg Birna Guttormsdóttir, sviðsstjóri hjá Umhverfisstofnun

Farið var yfir helstu aðferðir í kolefnisbindingu í hafi líkt og að sökkva lífmassa, endurheimt vistkerfa sjávar, efnafræðilegar aðferðir til minnka áhrif súrnunar  sjávar og aðferðir til þess að bæta við næringarefnum í sjó til þess að örva vöxt plöntusvifs og þar með ljóstillífun. 

Okkur þykir sérstaklega vænt um orð sem Jim Barry, mjög virtur vísindamaður á sviði vistfræði djúpsjávar, lét falla í pallborðinu. Hann hafði nýverið séð aðstöðuna okkar bæði á Grundartanga þar sem við vorum að vinna timburkurl með kalksteini ("kolefnisflothylkin”) og líftækni- og rannsóknaraðstöðuna á Akranesi, og sagði í kjölfarið á pallborðinu:

Þá hrósaði Andreas Oschlies (mín 44) íslenskum stjórnvöldum sérstaklega fyrir að vera leiðandi í heiminum og taka skrefið að veita Running Tide rannsóknarleyfi fyrir kolefnisbindingu í hafi. 

Pallborðið sammæltist um að stefnumótun og lagaramminn þurfi að þróast hratt til að ná utan um þessar nýju aðferðir en jafnframt aðlagast að yfirvofandi hættum sem stafa af loftslagsbreytingum. 

Hægt er að horfa á þessar spennandi og upplýsandi umræðurnar í heild sinni hér.

Við þökkum Transition Labs kærlega fyrir að skipuleggja!

Sælir kæru áskrifendur, 

25.000 tonn bundin!

• Síðasta ár og mánuðir voru viðburðarík fyrir okkur hjá Running Tide. Rannsóknar- og þróunarstarf okkar á Íslandi leiddi af sér bindingu á yfir 25,000 tonnum af koltvísýringsígildum (CO2e). Þar af afhentum við 21,000 kolefniseiningar til viðskiptavina okkar, en þeirra á meðal eru Microsoft, Shopify og Stripe, sem eru leiðandi kaupendur á valkvæða kolefnismarkaðnum í heiminum og vinna að því að byggja upp öruggan, ábyrgan og áhrifamikinn iðnað í kolefnisbindingu. 

• Eins og fram kemur á vefsíðunni okkar, þróum við aðferðir við kolefnisbindingu sem nýta sér og herma eftir náttúrulegum ferlum hafsins. Fyrsti fasi verkefnisins var að rannsaka og þróa aðferðir við að sökkva lífmassa af landi (í okkar tilfelli timbri) til varanlegrar geymslu á kolefni. Timburkurlið er húðað kalksteinsefnum til að vega á móti mögulegum neikvæðum áhrifum, áður en því er fleytt á rúmsjó ásamt mælitækjum til að fylgjast með og mæla áhrifin. (Sjá t.d. Carbon Plan - Terrestrial Biomass Sinking)

• Við höfum talað um og tekið þátt á ýmsum vísindaráðstefnum bæði hér heima og erlendis til að fjalla um þann árangur sem hefur náðst, en það er kannski ekki augljóst að á bak við tiltölulega einfalda aðgerð (að sökkva og binda kolefni varanlega) er mikil vísinda- og tækniþróun. Við vorum t.a.m með veggspjald á European Marine Biology Symposium 56 tengt rannsóknum okkar á mögulegum umhverfisáhrifum við stærri skala, og annað á Ocean Sciences Meeting 24 um spálíkönin og aðferðirnar sem við notum við að magnbinda og greina kolefnisbindinguna. Frekari upplýsingar á vefsíðunni okkar. 

• Eftir árið erum við eitt stærsta kolefnisbindingarverkefni heims, og stærst ef litið er til aðferða sem nýta hafið. Það er vissulega gaman að vera “stærst” í einhverju, en á sama tíma er það sem við höfum gert svo lítið í stóra samhenginu að það gerir mann nokkuð dapran að sjá hversu stutt við erum komin…

Þetta er nú meiri steypan…

• Íris Mýrdal, rannsóknarstjóri Running Tide á Íslandi hélt erindi á Steinsteypudeginum á dögunum, en þar fjallaði hún um samstarfsverkefni Running Tide og BM Vallá. Íris fór yfir sögu verkefnisins, helstu hindranir og þá ánægulegu niðurstöðu að ræktun þörunga á kolefnisbaujunum tókst vel.

• Nýverið voru gefnar út og birtar skýrslur á vefsvæði Running Tide docs.runningtide.com, en þar má meðal annars finna yfirlitsskýrslu um starfsemina á Íslandi árið 2023 og yfirlit yfir framgang og áherslur í rannsóknum og þróun tengda þörungum.

• Við tökum reglulega á móti gestum í starfsstöð okkar á Akranesi, en nú nýlega komu gestir frá Hringiðu-hraðlinum sem KLAK heldur utan um og spjölluðu við teymið okkar þar.

Hafsjór lausna…

• Röst rannsóknarsetur er samstarfsverkefni Transition Labs og alþjóðlega loftslagslausnaverkefnisins Carbon to Sea. Það mun vinna að lausnum tengdum því að auka basavirkni hafsins (e. Ocean Alkalinity Enhancement - sem er líka ein þeirra aðferða sem við þróum og notum).

• Fyrirtækið Vesta er að undirbúa rannsóknarverkefni í Bandaríkjunum þar sem þau munu dreifa 9,000 tonnum af ólivín til að auka basavirkni hafsins og binda þannig kolefni varanlega.

• Við tókum þátt í stofnun Hafbjargar, samtaka um sjálfbærni lausnir í hafi. Við mælum með að fólk skrái sig á póstlistann hafi það áhuga á lausnum tengdum hafinu og loftslagsmálum!

Kristinn Árni L. Hróbjartsson

framkvæmdastjóri Running Tide á Íslandi

Fagráðstefna skógræktarinnar fór fram dagana 21.-22.mars 2024 í Hofi Akureyri. Fagráðstefnan hefur verið haldin ár hvert síðan 2001 og var hún fjölmennari en nokkru sinni fyrr í ár.  

Að vanda voru mörg fróðleg erindi og veggspjöld tengd íslenskri skógrækt, en ár hvert er nýtt þema og í þetta skiptið var það “Skógarauðlindin - innviðir og skipulag.” Þar komu fram mörg áhugaverð erindi um hversu fjölbreytt verðmæti skóga eru.

Helgi Guðmundsson, sérfræðingur hjá Running Tide, var með veggspjald á Fagráðstefnunni sem bar nafnið Forest Floor to Ocean Floor (Frá Skógarbotni til Hafsbotnar). Veggspjaldið innhélt upplýsingar um hvernig fyrirtækið hefur nýtt lífmassa úr skógum til þróunar á þörungavexti á hafi og að endingu bindingu kolefnisins í hafdjúpunum til árþúsunda.  

Samhliða veggspjaldinu voru til sýnis þrjár mismunandi viðartegundir sem hafa verið nýttar í tilraunum á samspili viðar og þörungavaxtar á tilraunastofu okkar á Akranesi.
Einnig var til sýnis fljótandi viður af íslensku sitkagreni og stafafuru sem hefur verið í flottilraunum hjá Running Tide á Íslandi síðan í nóvember 2023.  

Ráðstefnugestir voru mjög áhugasamir um hugmyndafræði Running Tide og sjá þarna nýja leið til nýtingu lífmassa úr fyrstu grisjunum skóganna í þágu kolefnisbindingar.

Running Tide tók á móti gestum frá KLAK á dögunum í Öldu, líftæknisetur okkar á Akranesi. KLAK er félag sem hefur það hlutverk að stækka og styðja við samfélag frumkvöðla á Íslandi með það að markmiði að fjölga sprotafyrirtækjum. Í mars var viðskiptahraðall Klaks haldinn fyrir viðskiptahugmyndir og fyrirtæki á byrjunarstigi sem stuðla að hringrásarhagkerfinu og var því tilvalið fyrir þátttakendur í hraðlinum að kíkja til okkar í heimsókn. 

Við kynntum starfsemina í Öldu og fórum yfir sögu Running Tide, sem byrjaði sem lítið sprotafyrirtæki í Maine og hefur nú vaxið í það að hafa tugi starfsmanna á Íslandi og í Bandaríkjunum. Það sköpuðust skemmtilegar umræður um frumkvöðlaumhverfið á Íslandi og þau jákvæðu skilyrði sem leiddu til þess að Running Tide valdi Ísland til að setja upp fyrstu starfsstöð sína utan Bandaríkjanna. Það var virkilega gaman að taka á móti þeim og við þökkum KLAK fyrir góða heimsókn!

💥 Rétt í þessu settum við í loftið yfirlitsskýrslu um framgang okkar á árinu sem er að líða.

🌿 Við náðum margvíslegum mikilvægum áföngum, bundum 25.000 tonn af kolefni, hrintum af stað 5 rannsóknum á þörungavexti í úthafi og öðrum þremur djúpsjávarrannsóknum, settum út mælitæki til þess að prófa skynjara og líkön á rúmsjó og sköluðum upp þörungaframleiðsluna okkar á Akranes, svo eitthvað sé nefnt.  

👩🏼‍🏫Við höfum talað um þessi verkefni á alþjóðlegum vísindaráðstefnum, þ.m.t. EMBS (56th European marine biology symposium) og OSM24 (Ocean Sciences Meeting 2024).

🏛️ Skýrslan er sömuleiðis hluti af upplýsingagjöf- og samráðsferli okkar með stjórnvöldum, en við deilum með þeim gögnum reglulega.

Vísindamenn Running Tide eyddu fimmtudegi í febrúar á sjó í rannsóknarleiðangri. Veðrið lék við hópinn þegar siglt var inn í Hvalfjörð á bátnum Emilíu og ýmsar mælingar framkvæmdar áður en haldið var heim á leið. Slíkar ferðir eru tíðar hjá fyrirtækinu enda er starfsfólk orðið fært í flestan sjó.

Árið 2023 tókst teymi Running Tide að binda yfir 25,000 tonn af koltvísýringsígildum (CO2e) með því að skila kolefninu aftur úr hröðu hringrásinni í þá hægu. Fyrirtækið er þar með orðið leiðandi á heimsvísu í kolefnisbindingu í sjó. 

Þar af er búið að afhenda 21,000 einingar til leiðandi kaupenda á sviði kolefniseininga á heimsvísu - þar á meðal Microsoft, Shopify, og Stripe.

• Fréttatilkynning á PR NewsWire: Running Tide Delivers 21,000 Tonnes of Carbon Removal

Í meðfylgjandi myndbandi má sjá yfirlit yfir starfsemi okkar og þeim árangri sem náðst hefur  síðastliðið ár.

Árið 2023 var einnig viðburðaríkt fyrir Running Tide að öðru leyti: 

• 🔬 Við vorum með fyrstu fyrirtækjum til þess að framleiða kolefniseiningar með kolefnisbindingu í sjó og afhentum þær til alþjóðlega vefverslunar fyrirtækisins Shopify, tæknirisans Microsoft, og fjártæknifyrirtækisins Stripe, auk annarra.

• 🌊 Formleg opnun Öldu líftækniseturs á Akranesi fór fram í maí. Þar fara fram þörungarannsóknir og þróun Running Tide á Íslandi.

• ⚓️ Við stofnuðum Hafbjörgu ásamt fleiri fyrirtækjum og stofnunum. Hafbjörg eru samtök um bætta heilsu hafsins, sem hefur það að markmiði að auka vitund og þekkingu á þeim hættum sem steðja að hafinu og tækifærunum á því að nýta hafið sem hluti af lausninni. 

• 📝 Við vorum stofnaðili Reykjavík Protocol, sem eru meginreglur um framleiðslu kolefniseininga, þróaðar af leiðandi aðilum í kolefnisbindingu á heimsvísu.

• 👩🏼‍🏫 Við tókum þátt í ýmsum viðburðum, meðal annars Iceland Innovation Week, ársfundi samtaka fyrirtækja í sjávarútvegi, European Marine Biology Symposium, COP28 í Dubai og Slush í Helsinki

• 👫 Teymi Running Tide á Íslandi stækkaði og við bættum við okkur vísindafólki, líftæknifræðingum og hugbúnaðarsérfæðingum. 

• 👨🏻‍🔬 Við náðum stórum áföngum í þróun og rannsóknum og hrintum af stað fyrstu botnsjávarrannsókninni á Íslandi, komum fyrir mælibauju við Akranes, áframhaldandi þróun kolefnisbauja stóð yfir og við hófum einnig tvær alþjóðlegar rannsóknir, aðra í Kanada og hina í heimskautahafinu.

Íris Mýrdal, rannsóknarstjóri Running Tide, hélt erindi á Steinsteypudeginum sem haldinn var fyrir fullu húsi á Grand hótel þann 2. Febrúar síðastliðinn.

Íris fjallaði um mikilvægi kolefnisbindingar í sjó og rannsóknarverkefni sem fyrirtækið hefur verið að vinna með BM Vallá. Almennt er talið að u.þ.b. 8% af allri kolefnislosun heims séu rakin til framleiðslu sements og hafa steinsteypuframleiðendur eins og BM Vallá lagt mikla áherslu á að minnka kolefnisspor sitt. Running Tide vinnur hörðum höndum að því að færa kolefni úr hröðu kolefnishringrásinni í þá hægu og hefur undanfarin misseri unnið að þróun kolefnisbauja ásamt Birni Davíð Þorsteinssyni framkvæmdastjóra framleiðslusviðs BM Vallá og Joanna Bukowska, mastersnema. 

Íris fór yfir sögu verkefnisins, helstu hindranir og þá ánægulegu niðurstöðu að ræktun þörunga á kolefnisbaujunum tókst vel. Þörungahluti verkefnisins fór fram á rannsóknarstofu Running Tide á Akranesi leiddar af Ingólfi Braga Gunnarssyni, forstöðumanni hagnýtrar líftækni. 

Það eru spennandi tímar framundan í rannsóknum og þróun og þetta samstarf sýnir að það er hægt að leiða saman ólíka geira í áhugaverð verkefni og vonumst við til að það verði nóg af þeim í framtíðinni.  

Steinsteypufélags Íslands heldur Steinsteypudaginn árlega. Frábært yfirlit frá ráðstefnunni má sjá í meðfylgjandi myndbandi.

Rúm vika er liðin síðan að samþykkt náðist á COP28, og þó að við hefðum viljað að yfirlýsingar og niðurstöður samninga hefðu gengið lengra, þá er mörgu að fagna.

Við fundum fyrir raunverulegum meðbyr með frekari þróun kolefnis markaða og skölun á aðferðum til að binda kolefni í sjó. Helstu hápunktarnir fyrir okkur voru: 

• 🌊 Að það er mikil aukning á áhuga á hafinu, ekki síst vegna framgangs mögulegra sjálfbærnilausna sem tengjast hafinu síðasta árið.

• 🌏 Að fólk hefur almennt heyrt um Running Tide byggt á því að við stöndum framarlega í heiminum á þróun kolefnisbindingu í hafi.

• 🇮🇸 Ísland hefur mikla sérkunnáttu á málefnum hafsins og loftslagsmála og hefur margt fram að færa á stóra sviði loftslagsmála.

Ferðin hófst á heilsdags ráðstefnunni Ocean Innovators Platform sem var skipulögð af Stofnun Prins Alberts II af Mónakó, en þar talaði Brad Rochlin, Director of Strategic Partnerships í panel um kolefnisbindingu og náttúrulegar lausnir.

Running Tide tók þátt í skipulagningu dagskrá Skála hafsins - Ocean Pavilion - en Skáli hafsins er samstarf helstu hafrannsóknarstofnana, góðgerðarfélaga og fyrirtækja á heimsvísu með þann tilgang að setja málefni hafsins í forgrunn á ráðstefnunni.

Running Tide stóð fyrir tveimur panelum í Skálanum, annars vegar Effective and Actionable Governance Frameworks for Marine Carbon Dioxide Removal þar sem Brad Rochlin talaði fyrir hönd okkar, og hins vegar panel með heitið Advancing the Policy Landscape for Responsible Marine Carbon Dioxide Removal þar sem Kristinn Hróbjartsson tók þátt.

Þá talaði Brad á viðburði hjá Climate Registry um kolefnisbindingu og mikilvægi sannprófana (e. verification) til að styðja við uppbyggingu iðnaðarins: Carbon Removal and the Importance of Verification to Scale Removals.

Að lokum var Kristinn, framkvæmdastjóri Running Tide á Íslandi, beðinn um að flytja stutta tölu á bás Tanzaníu um nýsköpun í sjávarútvegi, og tók að því loknu þátt í panel um málið.

Marty Odlin, framkvæmdastjóri Running Tide, talaði á Slush ráðstefnunni í Helsinki á dögunum.

Þegar við hugsum um loftslagsvánna nálgumst við það yfirleitt með hugarfari sem snýst um að lágmarka skaðann, en í erindi sínu velti Marty fyrir sér hvort við getum nálgast það öðruvísi hugarfari. Í staðinn fyrir að samþykkja að öll kóralrif muni deyja þegar hiti hækkar um tvær gráður, hvað ef við ímyndum okkur heim þar sem við skilum jörðinni til næstu kynslóðar í jafn góðu eða betra standi en hún er í dag.

En til að gera þá heimsmynd að veruleika þarf að innleiða réttu hvatana til að fólk geri meira gott, en ekki bara minna slæmt. Marty kynnti fyrir ráðstefnugestum Reykjavík Protocol, sem Running Tide er stofnaðili að, sem er rammi fyrir fyrirtæki sem vilja starfa í sjálfbæra gerianum.

Á nýliðinni Arctic Circle ráðstefnu sem haldin var í Hörpu voru stofnuð samtökin Hafbjörg - Samtök um bætta heilsu hafsins. Auk Running Tide eru stofnendur samtakanna stofnanir og fyrirtæki sem koma að rannsóknum og þróun haftengdra lausna tengdum sjálfbærni og loftslagsmálum.

“Ljóst er að það er vaxandi súrnun sjávar við Ísland og stórt verkefni fyrir höndum ef við ætlum að snúa við þessari þróun. Mikilvægt skref er að auka þekkingu á þeim áhrifum sem loftslagsbreytingar hafa á hafið og það er mikið ánægjuefni að hafa helstu sérfræðinga á Íslandi á málefnum hafsins sem stofnendur samtakanna” segir Íris Mýrdal Kristinsdóttir, verkefnastjóri rannsókna hjá Running Tide

Tilgangur Hafbjargar er að auka vitund og þekkingu á þeim hættum sem steðja að hafinu sökum loftslagsbreytinga og á tækifærunum á því að nýta hafið sem hluta af lausninni. Samtökin munu standa fyrir upplýsingafundum og viðburðum auk þess að gefa út fræðsluefni tengt ýmsum málefnum haftengdra lausna með það fyrir augum að stuðla að upplýstri umræðu og miðla þekkingu.

Í stýrihópi samtakanna eiga sæti: 

• Íris Mýrdal Kristinsdóttir, verkefnastjóri rannsókna hjá Running Tide

• Angel Ruiz Angulo, dósent í haffræði við Háskóla Íslands

• Snjólaug Árnadóttir, forstöðumaður CLoCCS við Háskólann í Reykjavík

• Margrét Ormslev Ásgeirsdóttir, yfirmaður rekstrar hjá loftslagsfyrirtækinu Transition Labs

• Irene Polnyi forstöðumaður hjá Carbon to Sea Initiative.

• Alexandra Leeper, framkvæmdastjóri hjá Sjávarklasanum.

Að auki kemur alþjóðlega samstarfsnetið Ocean Visions að samtökunum, en Ocean Visions er leiðandi aðili á heimsvísu við að stuðla að framgangi rannsókna á sviðum haftengdra lausna á loftslagsvandanum, og vinnur með helstu hafrannsóknarstofnunum heims á því sviði.

• Frétt Morgunblaðsins um Hafbjörgu.

Hægt er að skrá sig á póstlista samtakanna á Hafbjorg.is, til að fá frekari upplýsingar um viðburði og verkefni.

Running Tide hefur í samstarfi við Breið þróunarfélag sett upp mælibauju við Akranes, sýnilega frá Breið nýsköpunarsetri. Baujan er hönnuð og smíðuð af fyrirtækinu og kemur til með að mæla hitastig, leiðni, sýrustig, styrk uppleysts súrefnis, magn svifagna, oxunar-afoxunar spennu (ORP) og blaðgrænu.

Með þessu verkefni verður til enn frekari þekking á tækni, aðferðum og stöðlum við greiningu á ástandi sjávar við Ísland með tilliti til loftslagsbreytinga sem og tækifæri til nýsköpunar við mat á áhrifum annarra utanaðkomandi þátta á heilsu sjávar, s.s. fiskeldis og fráveitu. Öll gögn birtast í rauntíma í þar til gerðum hugbúnaði, þróaður af Running Tide, og munu gestir Breiðar geta fylgst með ástandi sjávarins “í beinni.” Þessar upplýsingar geta nýst öðrum rannsóknaraðilum, útgerðum, Akraneskaupstað eða hverjum þeim sem hefur áhuga á sjávarheilsu.

Horft er til verkefnisins sem langtímavöktunar og upplýsingarnar sem safnast verða dýrmætar þar sem skortur er á viðlíka rannsóknum við Íslandsstrendur. Afrakstur verkefnisins felst í gagnagrunni, túlkun á honum og árlegri skýrslu um stöðu sjávarins þar sem baujan er staðsett. Aðferð þessi við mat á ástandi sjávar er viðbrögð ný, og mun koma sér vel fyrir aðgerðir í loftslagsmálum almennt og sem lausn fyrir ýmis konar eldi og iðnað til þess að vakta og bæta áhrif sín á sjóinn í kringum okkur.

Um Running Tide

Running Tide er alþjóðlegt, framsækið sjávartæknifyrirtæki sem vinnur að því að vakta, greina, og bregðast við heilsu sjávar, sem almennt fer hrakandi. Fyrirtækið hefur þróað tækni til að örva náttúrulega hæfni sjávarins við að binda kolefni varanlega úr hröðu kolefnishringrásinni í þá hægu, en hækkandi hitastig og súrnun sjávar má með beinum hætti rekja til koldíoxíðsmengunar í andrúmslofti og hafi af mannavöldum. Markmiðið er að bæta lífríki hafsins og skila ávinningnum til sjávarplássa.

• Sjá umfjöllun á Skessuhorn.is